Galdegaia

Perpaus batean, berri den edo azpimarratu nahi den zerbait jakinarazten duen atala.

–Aitak ekarri ditu sagarrak esatean, aitak da galdegaia (-Nork ekarri ditu sagarrak? galderari dagokion erantzuna da).

–Sagarrak ekarri ditu aitak perpausean, berriz, sagarrak da (-Zer ekarri du aitak? galderari dagokion erantzuna da).

Galdegaiaren legea perpaus laburretan eta elkarrizketetan betetzen da batez ere, galdera-erantzunetan alegia. Kontaketetan, berriz, hurrenkera askeagoa da eta ez dago lege edo gramatika arau esturik.

Galdera-erantzunezko perpausetan galdetzailea bera izaten da galdegaia:

–Zer edango duzu? -Ardo beltza edango dut.

Galdegaia aditzaren aurrean jarri ohi da, eta aditzarekin batera unitate foniko bat osatzen du; beraz, ez da nahikoa aditzaren aurreko lekuan egotea galdegaia izateko, ahoskatzerakoan aditzarekin batera eman behar baita.

Aditza bera denean galdegaia, zenbait euskalkitan egin aditza tartekatzen da aditzaren eta laguntzailearen artean.

–Zer gertatu zaio? -Hil egin da.

Perpauseko edozein atal izan daiteke galdegaia (izena, adjektiboa, adberbioa, aditza…) eta bide ezberdinak erabiltzen dira atal hori markatzeko.